ചിലരിങ്ങനെയാണ്

ചിതല്പ്പുറ്റുമൂടി നീരിനായലറുമ്പോള്

പുറ്റടര്ത്തി ജീവശ്വാസം പകര്ന്നാല്

കഴുത്തമര്ത്തി എന്ശ്വാസത്തെ തളച്ചിടുന്നു

എങ്കിലും സുഹൃത്തേ,നിനക്ക് വേണ്ടി
കാത്തിരിക്കുന്നു 

ഓരോ പ്രഭാതവും

പുതിയ കാഴ്ച്ചകളുമായ് 

എന്സ്നേഹത്തോടൊപ്പം.

മുള്കിരീടം

സഹയാത്രികയല്ലിവള്

എങ്കിലും 

വേദനയുടെ മുള്കിരീടം

സ്വയം വാങ്ങിയണിയാന്

നിര്ബന്ധിതയാണിവള്

ഓരോ നിമിഷവും 

ആഴ്ന്നിറങ്ങുന്ന

മുള്കിരീടമണിഞ്ഞ ശിരസ്സിനെ

കുത്തിനോവിക്കുന്നു 

നിണം പൊട്ടിയൊഴുകുന്ന

ആടിത്തിമിര്ക്കുവാനറിയാത്ത മനസ്സ്.

ഞാനിപ്പോഴുമങ്ങിനെയാണ്

എപ്പോഴോ പകുത്തുകിട്ടിയ സ്നേഹത്തിന്റെ

നറുനിലാവ് നെഞ്ചിലേറ്റുന്നവള്

കാലമോ ദേശമോ അറിയാതെ

മുറവിളികൂട്ടുന്ന ബന്ധനങ്ങള്ക്ക്

ഇടവേള നല്കി

ഞാനിപ്പോഴുമങ്ങിനെയാണ്

എപ്പോഴോ പകുത്തുകിട്ടിയ സ്നേഹത്തിന്റെ

നറുനിലാവ് നെഞ്ചിലേറ്റുന്നവള്

മുക്തി

നുരയും പതയുമായിരുന്നു വാക്കുകള്
കയ്പിന്റെ രുചിയായിരുന്നു നാക്കുകള്
കൊടുങ്കാറ്റടങ്ങിയപ്പോള്
അവന്റെ തിരിച്ചറിവ്
കൊടുങ്കാറ്റും സൂനാമിയും
ഉണ്ടാക്കിയത് എന്നിലും.
സ്നേഹം അവന് മടുക്കുമത്രേ
ആ കണ്ണുകളിലൂടെ,
സ്പര്ശനങ്ങളിലൂടെ
എത്രയെത്ര വേദനകള്
കടന്നുപോയികാണും.
ശേഷം,
മനസ്സ് വരഞ്ഞുകീറി
അല്പ്പം മുളകുപൊടി വിതറി
കറിവേപ്പിലയോടൊപ്പം
പുരപ്പുറത്ത് ഉണങ്ങാനിട്ടു.

ആവര്ത്തനം

മയക്കമില്ലാത്ത 

രാവുകളിലൊന്നില്

അവന്റെ ഉര് വരതയിലേയ്ക്ക്
ഒരു വിശപ്പുമാലകോര്ത്തിട്ടു.
അമര്ന്ന മൂളലുകളും 
കെട്ടിവരിഞ്ഞ സ്വപ്നങ്ങളും
അക്ഷരനോവുകളുമെല്ലാം ഇണപിരിയട്ടെ
എത്ര കായ്ച്ചാലും പൂത്താലും
കൊഴിഞ്ഞുവീഴുന്നൊരിടമുണ്ട്,
പിടയുന്ന മനസ്സിന് നോവുകള്ക്ക്
ആശ്വാസമാകുന്ന നിമിഷം.
ലൈംഗികതയുടെ
ആസക്തിയില്ലാത്ത പ്രണയമേ
അത്രമേല് പൊന്നേ
നിന്നെ ഞാനിന്നുമോര്ക്കുന്നു