Saturday, July 23, 2016

നീ എന്റെയൊരു അടയാളം മാത്രമാണ്!

വളർത്തുന്നുണ്ട് ചുണ്ടിൽ 
ഉമ്മയെന്ന് പേരിട്ടൊരു 
ബലി മൃഗത്തെ
മുലക്കച്ചത്തടവിൽ 
നിർത്താതെ ചുരത്തുന്നു 
വായില്ലാ പശുക്കൾ
അടിവസ്ത്രച്ചൂടിൽ
അശ്ലീലം ഭയന്നൊരു 
അകാല വാർദ്ധക്യം.
ഗ്രീഷ്മമിറ്റിച്ചിട്ട 
ചുവന്ന പൂക്കളിൽ 
അയിത്തം കറുക്കുമ്പോൾ
നാപ്കിൻ പാഡുകൾ 
ജലമൂറ്റുന്ന കോർപ്പറേറ്റെന്നും 
തീണ്ടാരിത്തുണി ചുരുട്ടി 
സമരാദർശം പുലമ്പരത്.
ഒരു നുള്ള് ചോരയാൽ 
അശുദ്ധി കൊത്തിയ 
വാതിലാരുടേതാണ്.
പ്രണയമെന്ന് പേരിട്ട് 
നീ എയ്യുന്ന നുണകൾ 
കണ്ണിൽ തറയ്ക്കുന്നു.
ഒന്നാം ലിംഗമെന്നാവേശം 
ഒരോർമ്മത്തെറ്റാണ്
എന്റെ അരക്കെട്ട് 
താങ്ങി നിൽക്കുന്നുണ്ട് 
ആണത്തം ചുരുണ്ടുകൂടുന്ന 
ഒരു കംഗാരു സഞ്ചി
നീ എന്റെയൊരു 
അടയാളം മാത്രമാണ്!


8 comments:

സുധി അറയ്ക്കൽ said...

ഓ.എത്ര കട്ടി!!!😳

വിനുവേട്ടന്‍ said...

എനിക്കും ഒന്നും മനസ്സിലായില്ല... :(

വിനുവേട്ടന്‍ said...

എനിക്കും ഒന്നും മനസ്സിലായില്ല... :(

Bipin said...

ആണത്തം ചുരുണ്ടു കൂടുന്ന സഞ്ചി എന്ന് വീരവാദം മുഴക്കുമ്പോഴും നിർത്താതെ ചുരത്തുന്ന മുലയും ദാഹിക്കുന്ന ചുണ്ടും എന്നും കാത്തു നിൽക്കുന്നു. കറുത്ത ചോരയിൽ അയിത്തം സ്വയം ഉൾക്കൊള്ളാനും തയ്യാറാകുന്നു.

ഗദ്യ കവിത

ManzoorAluvila said...

ഒരു നുള്ള് ചോരയാൽ അശുദ്ധി കൊത്തിയ വാതിലാരുടേതാണ്

നീ എന്റെയൊരു അടയാളം മാത്രമാണ്!

ആണ്‍ വര്‍ഗ്ഗം നിര്‍മിച്ച നിയമാവലിയില്‍ ഉതിര്‍ന്നു തീരുന്ന സ്ത്രീ ജന്മം..

നന്നായ്

ആശംസകള്‍

Rajesh Velayudhan said...
This comment has been removed by the author.
Rajesh Velayudhan said...

ചാട്ടുളി പോലെ ചീറ്റുന്ന വാക്കുകൾ ഏറ്റ് കറുത്ത ചോരപൊടിയുന്നു...
ആണത്തത്തെകുരുക്കുന്ന കങ്കാരുസഞ്ചിയുടെ ഭീഷണിയിൽ ... പൗരുഷം ഫണമൊതുക്കി.. തളർന്നൊതുങ്ങുന്നു...
സ്നേഹസമർപ്പണമായി നേദിച്ച... ഉമ്മകളെല്ലാം..
ബലിത്തറയിലൊടുങ്ങിയിരിക്കുന്നൂ...

pravaahiny said...

യാഥാർത്ഥ്യത്തിന്റെ പച്ചയായ കാഴ്ച